సింగరేణి ఉద్యోగాల స్థానికత పై డిప్యూటీ సీఎం దృష్టికి తీసుకెళ్లిన మంత్రి పొన్నం  

• మంత్రి ప్రభాకర్ విజ్ఞప్తి కి సానుకూలంగా స్పందించిన డిప్యూటీ సీఎం విక్రమార్క
• ఉమ్మడి నాలుగు జిల్లాలు కరీంనగర్, అదిలాబాద్ , ఖమ్మం, వరంగల్ సింగరేణి స్థానికతనే 
• ఉమ్మడి కరీంనగర్ జిల్లా నుండి సిద్దిపేట జిల్లాల్లో కలిసిన 4 మండలాల నిరుద్యోగులకు న్యాయం: మంత్రి పొన్నం

హైదరాబాద్ :
ది సింగరేణి కాలరీస్ కంపెనీ లిమిటెడ్ పరిధిలో అదిలాబాద్ కరీంనగర్ , వరంగల్ , ఖమ్మం నాలుగు ఉమ్మడి జిల్లాలు సింగరేణి స్థానికత ను కలిగి ఉన్నాయని మంత్రి పొన్నం ప్రభాకర్ సోమవారం తెలిపారు. జిల్లాల పునర్విభజన లో ఉమ్మడి కరీంనగర్ జిల్లాలో ఉన్న హుస్నాబాద్ , అక్కన్నపేట్ , కొహెడ , బెజ్జంకి లు నాలుగు మండలాలు సిద్దిపేట జిల్లాలో కలపడం వల్ల హైదరాబాద్ జోన్ లోకి రావడంతో సింగరేణి ఉద్యోగాలకు స్థానికత కోల్పోవడం జరిగింది.

దీంతో ఈ మండలాలకు సంబంధించిన పలువురు నిరుద్యోగులు మంత్రి పొన్నం ప్రభాకర్ దృష్టికి తీసుకెళ్లారు. పాత కరీంనగర్ మండలాలను సిద్దిపేట లో కలపడం వల్ల సింగరేణి ఉద్యోగాలకు తాము అర్హత కోల్పోయామని వారు మంత్రి పొన్నం ప్రభాకర్ కు వివరించారు. విషయం తెలుసుకున్న మంత్రి పొన్నం ప్రభాకర్ ఈ అంశాన్ని డిప్యూటీ సిఎం, ఇంధన శాఖ మంత్రి భట్టి విక్రమార్క దృష్టికి  తీసుకెళ్లారు. వెంటనే డిప్యూటీ సిఎం బట్టి విక్రమార్క సింగరేణి సిఎండి తో మాట్లాడారు. జిల్లాల పునర్విభజన సమయంలో సింగరేణి ఉద్యోగాల కోసం స్థానికత కోల్పోయిన మండలాల పై చర్చించారు. ఎవరికి అన్యాయం జరగకుండా చూడాలని సిఎండి ని డిప్యూటీ సీఎం విక్రమార్క ఆదేశించారు..

దీంతో సింగరేణి పరిధిలో ఉన్న పాత ఉమ్మడి 4 జిల్లాలు అదిలాబాద్ , కరీంనగర్, వరంగల్, ఖమ్మం సింగరేణి పరిధిలోకి వస్తాయని ఆయ జిల్లాలో ఉన్న నిరుద్యోగులు సింగరేణి స్థానికత వస్తుందని డిప్యూటీ సిఎం బట్టి విక్రమార్క..మంత్రి పొన్నం ప్రభాకర్  కు తెలిపారు. కరీంనగర్ నుండి సిద్దిపేట జిల్లాలో కలిసిన నాలుగు మండలాలు అందులో హుస్నాబాద్ నియోజకవర్గానికి సంబంధించిన 3 మండలాలైన హుస్నాబాద్ , అక్కన్నపెట్ , కొహెడ మండలాలకు న్యాయం జరిగిందని మంత్రి పొన్నం ప్రభాకర్ హర్షం వ్యక్తం చేశారు. ఇక నుండి సింగరేణి కాలరీస్ విడుదల చేసిన నోటిఫికేషన్ లో ఉమ్మడి నాలుగు జిల్లాల నిరుద్యోగులకు అర్హత ఉంటుందని మంత్రి పొన్నం ప్రభాకర్ వెల్లడించారు. వెంటనే సమస్య పరిష్కారానికి చొరవ చూపిన డిప్యూటీ సిఎం విక్రమార్క కు మంత్రి పొన్నం ప్రభాకర్ ధన్యవాదాలు తెలిపారు.